O número premiado da Noite da Moura

Por estes lares andamos a recuperarnos da troula do sábado da Noite da Moura.
Mentres elaboramos unha crónica xeitosa de todo o que pasou, deixámosvos o número premiado con 100€ ou un cabrito:

3.593

O propietario do número atopábase na eira e puido subir a recoller o premio:

O Entroido

Xa vai alá case un mes dende o sábado de Entroido en Rebordechán, pero a nós parécenos que non pasou case tempo porque seguimos a escachar coa risa cando recordamos o ben que o pasamos. E é que... en Rebordechán, a festa está garantida!

Comezamos ás cinco da tarde, xuntándonos no Pazo. Había dende magos a cabezudos, estrelas, vellas, bispos e mozas.

O primeiro foi baixar ao meco, que neste 2013, como ben podedes ver, era unha señorita moi elegante e ben feitiña. Miña pobre! Ela non sabía o que lle esperaba! Como responsable á que achacamos todos os problemas do ano pasado, despois de lerlle a sentencia, non lle quedaba outra que arder no lume.

 Máis tarde, continuaron a música, os chourizos, os sorrisos e as gargalladas, o viño con azucre, os bailes, a boa compañía, o tempo para compartir, as bromas,... A FESTA!

Tanto se estivestes como se non nesta, non podedes perdervos a seguinte!
En Rebordechán, sempre vos esperamos cos brazos abertos! Non vos esquezades...

VIVE (vivide) REBORDECHÁN!!!

A cea da Asociación e Cantar os Reis

 A verdade é que, en Rebordechán, o tempo pasa moi rápido. Sempre hai cousas que facer, sempre hai festas nas que pensar, días que preparar. E, neste tempo dende a anterior entrada, non ía ser menos: a Cea de Asociación e o Cantar os Reis chegaron moi rápido e fixéronnos disfrutar a moreas!

CEA DA ASOCIACIÓN

Coma sempre, como cada ano, a Cea da Asociación non defraudou.

En coches particulares ou en autobús fomos chegando á Arnoia. A mesa esperábanos xa posta, así que só nos quedou ben-comer e ben-beber! Como podedes ver nas imaxes, pasamos unha estupenda cea xuntos.

Rematada a paparota, a festa chegou da man do Castriño, que nos fixeron bailar e cantar a fartar!

CANTAR OS REIS

Chegamos ao 5 de xaneiro, día propio de Cantar os Reis, coas cancións ensaiadas e as gorxas preparadas para moito canto e... para moita comida e bebida!

Comezamos por Tixosa, onde nos recibiron a primeira hora con moitas enerxías, con café para todos e moitas ganas de xoldra.

Despois, seguimos por Parada, os ánimos non decaíron en absoluto! Tempo para panxoliñas, para os rexóns, para música, para risas, para bailes, para... festa!

E, coma sempre, como cada ano, a noite chegounos no Surreiro, no Tarendo, na Pousa, no Pazo, no Cotado e na Casola. O cansazo non se vía por ningures! Foron momentos para cantar a pleno pulmón, para bailar ao son do Castriño, tempos para o caldo e a sopa, para o viño, para a bica, ...

Agora xa andamos a pensar no Entroido. Anotade o 9 de febreiro na axenda... esperámosvos!

De agosto a novembro en tres festas

A Rebordechán, sen darnos conta, na volta dunha man, xa chegou o outono: comezaron a caer as follas, comezou a refrescar, abriuse a tempada de cocido e castañas e a da cociña de leña.

A nós pasáronnos moi rápido estes tres meses. E é que, coma sempre, imos de festa en festa: primeiro a Festa de Agosto, despois a Festa dos Cativos e finalmente, o Magosto.

FESTAS DE AGOSTO

As Festas de Agosto, a fin de semana do 17, 18 e 19, reuníronnos arredor da familia e dos amigos coma cada ano. Comezamos o venres pola tarde, co percorrido da charanga Colores polas nosas rúas e seguimos coa queimada e a festa no Pazo, pola noite.

Charanga no Pazo

Queimada do venres

O sábado erguémonos cedo para continuar coa festa. Primeiro foi a misa en San Sebastián, co concerto da Banda; despois a tirada de fogos e, xa pola noite, chegou a hora de bailar coas orquestras Satélites e Televisión. 

Misa en San Sebastián

Os fogos do sábado

Festa do sábado

E xa o domingo, despois de dous días de festa, levantámonos para ir á misa á Igrexa, á procesión e ao concerto da Banda.

Misa do domingo

 Foi unha fin de semana estupenda, onde aproveitamos para vernos e divertirnos tanto cos veciños como con todos os que nos viñestes visitar.

Quedamos para o 2013!

FESTA DOS CATIVOS

Como xa é tradición en Rebordechán, o sábado seguinte á Festa de Agosto, xuntámonos para celebrar esa festa adicada aos nenos de 0 a 100 anos que queren vir a gozar dunha tarde de xogos e risas. Este 25 de agosto foi estupendo!

Os preparativos comezaron a primeira hora da tarde: adicámonos a encher e colocar globos, a colgar mazás, a buscar os sacos, a pór as botellas, as cordas, os aros e todas esas cousas que fan unha tarde estupenda.

Preparativos para a batalla cos globos de auga

 Máis tarde, comezaron a chegar os nenos, comezou a encherse todo, empezaron a escoitarse as risas divertidas, as pelexas polo mellor sitio, os berros, e todas esas cousas que amosan vida!

O xogo das botellas e os aros

Xogando ás sillas

Os globos!

Finalmente, despois de moitos xogos e moitas carreiras, repartimos os regalos para os máis pequenos e sentámonos a recuperar forzas cun chocolate quentiño e un anaco de roscón ou bica.

Queremos vervos para o ano outra vez!

O MAGOSTO

Coa chegada do frío e da chuvia, comezamos a pensar no magosto.

En Rebordechán, celebrámolo o 27 de outubro. Foi unha tarde de vento e frío, que non nos impediu disfrutar do noso Magosto. Houbo castañas e viño, orella a fartar, bica, bocadillos de touciño e, sobretodo, como podedes ver nas imaxes, houbo moita festa!

Castañas, orella e viño

Reparto de orella

Festa!

O Castriño amenizando a Festa

Non queremos rematar sen agradecer a todos os que viñestes a pasalo ben con nós en todas estas festas e emprazarvos, a vós e a todos os demáis, a que vos pasedes cando queirades... Seredes moi ben recibidos!

A romería do Castriño

 O mes de xuño é abundante en eventos sociais en Rebordechán. O último do mes é sempre O Castriño: a romería veciñal de Rebordechán; ese día onde nos xuntamos a falar, a rir, a pasalo ben, coa familia e cos veciños, arredor de mesas cheas de comida e ricos postres, licores e outros refrixerios.

Nas anteriores edicións, sempre tivemos bo tempo; pero este ano, parecía que a chuvia quería estar connosco. Aínda así, non nos desilusionamos; xa de boa mañá había xente carrexando mesas e cadeiras, manteis, e outros enseres nun continuo ir e vir. Co paso da mañá, foi chegando a pulpeira e a rosquilleira e moitos máis veciños que, pouco a pouco, comezamos a sentarnos arredor da nosa xente a gozar da xornada.

Houbo tempo para conversas, comidas e postres; houbo tempo para bailar, para rir moito, para recibir a catro "vellas" ben simpáticas; houbo tempo para tocar máis de catro e cinco pezas; para cantar o "Cumpreanos feliz"; para comer e para merendar; pero, sobre todo, houbo tempo para compartir.

Noite da Moura

A Noite da Moura, para Rebordechán, comezou moi cedo pola mañá, cando nos xuntamos en San Sebastián un bo número de veciños preparados para aportar o máximo posible no día final de montaxe e organización.

O día transcorreu entre montaxes do palco, do bar, do posto da Asociación Cultural e do da orella; entre viaxes arriba e baixo, transportando cousas; entre quilómetros colgando paneis indicadores; entre ramallo e ramallo, saco e saco, corda e corda;... O día transcorreu rápido e cando nos quixemos dar conta, todo estaba listo, á noitiña, na espera de que todos vos achegarades a gozar connosco desta noite especial. 

Escenario á noitiña

Como sabedes, a lenda da Noite da Moura conta que:

"En Rebordechán, cada ano no mes de San Xoán, as damas dos castros eran convocadas na Eira do Castro do Coruxón, polo feiticeiro, a quen lle facían as pregarias para os próximos doce meses. Coa súa xuntanza, chamaban á moura; quen, coa súa danza encantada provocaba que, a cabra obsequiara aos veciños de Rebordechán cun fillo, para que se mantivese a estirpe. Os habitantes agradecíanllo aos deuses tocando gaitas e tambores, comendo carne de porco e bebendo viño baixo o orballo ata o raiar do novo día, para ver bailar o sol cunha cunca de caldo na man".

E este ano, non foi diferente. Conseguimos volver ver as damas, o feiticeiro, a moura e a cabra, que se xuntan en tan ancestral rito, arredor dun pequeno lume.

Danza da Moura

Despois, festexámolo con orella, caldo e viño; festexámolo con moita música, moitos grupos, moitos sorrisos, moito baile e moita xente. O tempo permitiunos gozar dunha noite máxica...

Festa rachada

Dende aquí, xa para rematar, queremos pedir disculpas polos posibles erros que se puideran dar; e agradecer a presencia de todos os que nos acompañaron este 16 de xuño.

Esperámosvos o próximo ano, na 5ª Noite da Moura!

Número da sorte

O número da sorte que decidiu a cabra, esta Noite da Moura, foi o:

4081