De agosto a novembro en tres festas

A Rebordechán, sen darnos conta, na volta dunha man, xa chegou o outono: comezaron a caer as follas, comezou a refrescar, abriuse a tempada de cocido e castañas e a da cociña de leña.

A nós pasáronnos moi rápido estes tres meses. E é que, coma sempre, imos de festa en festa: primeiro a Festa de Agosto, despois a Festa dos Cativos e finalmente, o Magosto.

FESTAS DE AGOSTO

As Festas de Agosto, a fin de semana do 17, 18 e 19, reuníronnos arredor da familia e dos amigos coma cada ano. Comezamos o venres pola tarde, co percorrido da charanga Colores polas nosas rúas e seguimos coa queimada e a festa no Pazo, pola noite.

Charanga no Pazo

Queimada do venres

O sábado erguémonos cedo para continuar coa festa. Primeiro foi a misa en San Sebastián, co concerto da Banda; despois a tirada de fogos e, xa pola noite, chegou a hora de bailar coas orquestras Satélites e Televisión. 

Misa en San Sebastián

Os fogos do sábado

Festa do sábado

E xa o domingo, despois de dous días de festa, levantámonos para ir á misa á Igrexa, á procesión e ao concerto da Banda.

Misa do domingo

 Foi unha fin de semana estupenda, onde aproveitamos para vernos e divertirnos tanto cos veciños como con todos os que nos viñestes visitar.

Quedamos para o 2013!

FESTA DOS CATIVOS

Como xa é tradición en Rebordechán, o sábado seguinte á Festa de Agosto, xuntámonos para celebrar esa festa adicada aos nenos de 0 a 100 anos que queren vir a gozar dunha tarde de xogos e risas. Este 25 de agosto foi estupendo!

Os preparativos comezaron a primeira hora da tarde: adicámonos a encher e colocar globos, a colgar mazás, a buscar os sacos, a pór as botellas, as cordas, os aros e todas esas cousas que fan unha tarde estupenda.

Preparativos para a batalla cos globos de auga

 Máis tarde, comezaron a chegar os nenos, comezou a encherse todo, empezaron a escoitarse as risas divertidas, as pelexas polo mellor sitio, os berros, e todas esas cousas que amosan vida!

O xogo das botellas e os aros

Xogando ás sillas

Os globos!

Finalmente, despois de moitos xogos e moitas carreiras, repartimos os regalos para os máis pequenos e sentámonos a recuperar forzas cun chocolate quentiño e un anaco de roscón ou bica.

Queremos vervos para o ano outra vez!

O MAGOSTO

Coa chegada do frío e da chuvia, comezamos a pensar no magosto.

En Rebordechán, celebrámolo o 27 de outubro. Foi unha tarde de vento e frío, que non nos impediu disfrutar do noso Magosto. Houbo castañas e viño, orella a fartar, bica, bocadillos de touciño e, sobretodo, como podedes ver nas imaxes, houbo moita festa!

Castañas, orella e viño

Reparto de orella

Festa!

O Castriño amenizando a Festa

Non queremos rematar sen agradecer a todos os que viñestes a pasalo ben con nós en todas estas festas e emprazarvos, a vós e a todos os demáis, a que vos pasedes cando queirades... Seredes moi ben recibidos!

A romería do Castriño

 O mes de xuño é abundante en eventos sociais en Rebordechán. O último do mes é sempre O Castriño: a romería veciñal de Rebordechán; ese día onde nos xuntamos a falar, a rir, a pasalo ben, coa familia e cos veciños, arredor de mesas cheas de comida e ricos postres, licores e outros refrixerios.

Nas anteriores edicións, sempre tivemos bo tempo; pero este ano, parecía que a chuvia quería estar connosco. Aínda así, non nos desilusionamos; xa de boa mañá había xente carrexando mesas e cadeiras, manteis, e outros enseres nun continuo ir e vir. Co paso da mañá, foi chegando a pulpeira e a rosquilleira e moitos máis veciños que, pouco a pouco, comezamos a sentarnos arredor da nosa xente a gozar da xornada.

Houbo tempo para conversas, comidas e postres; houbo tempo para bailar, para rir moito, para recibir a catro "vellas" ben simpáticas; houbo tempo para tocar máis de catro e cinco pezas; para cantar o "Cumpreanos feliz"; para comer e para merendar; pero, sobre todo, houbo tempo para compartir.

Noite da Moura

A Noite da Moura, para Rebordechán, comezou moi cedo pola mañá, cando nos xuntamos en San Sebastián un bo número de veciños preparados para aportar o máximo posible no día final de montaxe e organización.

O día transcorreu entre montaxes do palco, do bar, do posto da Asociación Cultural e do da orella; entre viaxes arriba e baixo, transportando cousas; entre quilómetros colgando paneis indicadores; entre ramallo e ramallo, saco e saco, corda e corda;... O día transcorreu rápido e cando nos quixemos dar conta, todo estaba listo, á noitiña, na espera de que todos vos achegarades a gozar connosco desta noite especial. 

Escenario á noitiña

Como sabedes, a lenda da Noite da Moura conta que:

"En Rebordechán, cada ano no mes de San Xoán, as damas dos castros eran convocadas na Eira do Castro do Coruxón, polo feiticeiro, a quen lle facían as pregarias para os próximos doce meses. Coa súa xuntanza, chamaban á moura; quen, coa súa danza encantada provocaba que, a cabra obsequiara aos veciños de Rebordechán cun fillo, para que se mantivese a estirpe. Os habitantes agradecíanllo aos deuses tocando gaitas e tambores, comendo carne de porco e bebendo viño baixo o orballo ata o raiar do novo día, para ver bailar o sol cunha cunca de caldo na man".

E este ano, non foi diferente. Conseguimos volver ver as damas, o feiticeiro, a moura e a cabra, que se xuntan en tan ancestral rito, arredor dun pequeno lume.

Danza da Moura

Despois, festexámolo con orella, caldo e viño; festexámolo con moita música, moitos grupos, moitos sorrisos, moito baile e moita xente. O tempo permitiunos gozar dunha noite máxica...

Festa rachada

Dende aquí, xa para rematar, queremos pedir disculpas polos posibles erros que se puideran dar; e agradecer a presencia de todos os que nos acompañaron este 16 de xuño.

Esperámosvos o próximo ano, na 5ª Noite da Moura!

Número da sorte

O número da sorte que decidiu a cabra, esta Noite da Moura, foi o:

4081

Noite da Moura

A Noite da Moura do 2012 achégase! Esperámosvos a todos o 16 de xuño!
Para ir abrindo boca, aquí tendes o vídeo do 2011.

http://www.youtube.com/watch?v=AcRfCALDU_0&feature=player_detailpage

A excursión 2012

Xa ben cedo, o autobús esperábanos para pór rumbo a terras luguesas. Despois de varias horas de autobús, algunha parada, moitos sorrisos, algunha dor de cú; chegamos á primeira parada importante: O Cebreiro.

Un paseo, estirar as pernas, unha tapa e, sobretodo, algunhas pezas que nos fixeron espertar (a nós e aos turistas que decidiron a participar da nosa festa).

A seguinte parada xa foi en terras leonesas, o concello de Balboa esperábanos para darnos moita información local en "La Casa de las Gentes" e, despois, ofrecernos moita e boa comida na súa estupenda Palloza. A cambio, seguimos repartindo sons de O Castriño en calquera sitio, con calquera oportunidade.

Xa coa barriga chega, puxemos rumbo a Lugo. Un pouco de turismo antes de volver á casiña, xa de noite, moi contentos e desexando que chegue a próxima.

As novas tecnoloxías chegan a Rebordechán

As novas tecnoloxías chegan as aldeas e con forza. No caso da parroquia de Rebordechán a cousa empezou co perfil en facebook da agrupación musical O Castriño, seguido tempo despois deste blogue e a nova páxina web que está o caer.  Pouco a pouco os veciños/as fóronse sumando a internet, o facebook e as novas tecnoloxías e claro... tanta novidade fai que o día a día e as costumes da terra vaian cambiando e se non o creedes mirade as seguintes imaxes:

Nota do administrador: Calquera parecido dos personaxes con algún veciño/a de Rebordechán e mera coincidencia.

Fonte: O bichero

Esta fin de semana non paramos !

Esta fin de semana, Rebordechán estuvo atarefada. É que non demos feito! As xuntanzas, festas e reunións enchéronnos as horas.


Comezamos xa ben cedo, o sábado pola mañá, coa actuación na veciña Filgueira. E é que, como ultimamente nestas datas, o San José requería a nosa presencia. Por mor da auga que caía, transladamos a paparota aos baixos da Pousa, sempre boa acolledora, que sempre nos adopta.






Á tardiña puxemos rumbo a Boborás. E continuamos entre música, risas, baile e boa festa ata ben entrada a noite.




Pero non todo é algarabía e festa, entre unhas cousas e outras houbo tempo para a xuntanza de organización da Noite da Moura que se aveciña (16 de xuño) e para ultimar os preparativos para a Excursión da próxima semana.


Dende Rebordechán, estamos encantados de irvos informando; de ir contándovos datas e cousas; e, sobre todo, de compartir con moitos de vós, moitos momentos.

A excursión

Coma todos os anos chegados a esta época, en Rebordechán en xeral e na Asociación Amistade en particular, xa andamos rematando os preparativos e organización da Excursión. Este ano será o vindeiro sábado, día 12 de maio, cando nos recollerá o autobús á primeira hora da mañá para achegarnos a Lugo e ás montañas leonesas, en concreto a Balboa, a facer algo de turismo, comer ben, tocar unhas pezas,...; e traernos de volta, xa con noite pecha, pensando xa na do ano seguinte.

Esperámosvos!

Músicas do mundo

Playing For Change é un movemento multimedia creado para inspirar, conectar e promover a paz no mundo a través da música. Deixovos unha excelente versión de Stand By Me. Espero que ha disfrutedes.


                                       

O Entroido

En Rebordechán, xa hai días que, cando saes fóra, cheiran as acacias, un símbolo inequívoco de que chegou a Cuaresma e de que os días de Entroido, remataron.

O Entroido, aquí, coma sempre quedou curto pero foi moi intenso.

Comezamos o sábado 11 pola tarde, coa feitura dos mecos. Herba seca, roupa vella e un pouco de inxenio foron os ingredientes para unha parella ben simpática; que tiña como destino a queima o seguinte sábado e que, na espera, estivo colgada durante a semana no Pazo.

 

O sábado 18, amencimos cos preparativos: había que ir buscar o pan e o roscón, os chourizos e o touciño; preparar o equipo de música e darlle os últimos retoques ao disfrace.

Pola tarde, a xuntanza xa comezou ben interesante. A partir das 4 comezaron a chegar das máis extrañas persoaxes: piratas, tunos, a señora que facía o pino, hippies, Misses, durmilóns, vellas e vellos, curas… había de todo!

Cando lle chegou a hora á parella, fomos buscala entre todos para darlle final.

E, coas laparadas do lume que os consumía, aínda presentes, empezamos a preparar a merenda. Un sinfín de bocadillos de touciño e chourizo desfilaron diante nosa; tiñamos viño con azucre para regar as gorxas; e, a cousa foise animando. A música non faltou, nunca falta: O Castriño regalounos unha chea de boas pezas para bailar.

E así, aos poucos, foi chegando a noitiña, entre música, comida, sorrisos e veciños. Agora, neste comezo de Cuaresma, xa lavamos e empaquetamos os traxes, para gardar ata o ano seguinte. E xa comezamos a preparar a seguinte festa, as seguintes xuntanzas do ano.

Esperámosvos!

 ¡¡¡VIVE REBORDECHÁN!!!